Oʻzbekiston Respublikasi Fanlar akademiyasi akademigi, pedagogika fanlari doktori, professor Xolboy Ibragimov Navoiy davlat universitetiga tashrif buyurdi.
Dastlab, akademik X.Ibragimov universitet rektori, professor M.Kalonov bilan uchrashib, doʻstona va samimiy muloqot qildi. Muloqot davomida oliy taʼlim dargohini yangi bunyod etilayotgan kampusi, shuningdek, oʻquv-uslubiy, maʼnaviy-maʼrifiy, ilmiy-tadqiqot sohalari haqida maʼlumot berildi.
Akademik Xolboy Ibragimov universitet talaba-yoshlari bilan uchrashdi.
Uchrashuvda universitet rektori Muxiddin Kalonov, soha prorektorlari, dekanlar, kafedra mudirlari, professor-oʻqituvchilar hamda talaba-yoshlar ishtirok etdi. Uchrashuv davomida akademik X.Ibragimov tadbir ishtirokchilariga oʻzining ilmiy va amaliy faoliyati, akademik darajasigacha yetib kelishdagi sermashaqqat hayot yoʻli, mehnatlari haqida soʻzlab berdi. Shuningdek, bugungi kunda yoshlarga qaratilayotgan eʼtibor va ilm-fan sohasida yaratilayotgan imkoniyatlar haqida toʻxtalib, talaba-yoshlarni yaratilayotgan bunday imkoniyatlardan unumli foydalanishga chaqirdi.
Akademik X.Ibragimov yurtimizdagi ilm-fan sohasi uchun malakali mutaxassislar va ilmiy-pedagogik kadrlar tayyorlashda qoʻshayotgan fidokorona hissasi, koʻp yillik samarali mehnatlari hamda Navoiy davlat universiteti bilan hamkorligi uchun universitet rahbariyati tomonidan esdalik sovgʻalari bilan taqdirlandi. Uchrashuv yakunida talaba-yoshlar oʻzlarini qiziqtirgan savollariga javoblar oldi.
Tashrif chogʻida akademik Xolboy Ibragimov universitet tuzilmasidagi Qatagʻon qurbonlari xotirasi muzeyi faoliyati bilan tanishdi.
