Navoiy davlat universitetida O‘zbekiston Yozuvchilar uyushmasi a’zosi, taniqli shoir, “Do‘stlik bayrog’i” va “Знамя дружбы” gazetalari bosh muharriri Boboqand (Umarov) Mirzo qalamiga mansub “Ko‘rgulik” kitobining taqdimot marosimi o‘tkazildi. Tadbirda Navoiy davlat universiteti rektori, professor Muxiddin Kalonov, O‘zbekiston Jurnalistlar uyushmasi Navoiy viloyat bo‘limi raisi Otabek Aslonov, O‘zbekiston Yozuvchilar uyushmasi a‘zolari, shoira Salima Umarova, O‘lmas Samarqandiy, Musfira Munavvarova, Iftixor Xonxo‘jayevlar ishtirok etdi.
Tadbir avvalida “Ko‘rgulik” kitobi haqida universitet rektori o‘z fikr-mulohazalarini bildiridi. Rektor o‘z nutqida Boboqand Mirzoning ushbu kitobi uchun so‘zboshi yozgan O‘zbekiston Xalq yozuvchisi Usmon Azimning haroratli satrlaridan misollar keltirish bilan boshlab, kitobdagi go‘zal shohbaytlar orqali inson qalbi manzaralarini ta’riflab berdi. Jurnalistlar uyushmasi viloyat bo‘limi raisi Otabek Aslonov yangi kitobning ahamiyati, badiiy saviyasi, o‘ziga xos uslubi haqida mulohazalarini bildirdi.
Tadbirda qatnashgan shoir va yozuvchilar ushbu kitobdan joy olgan nafis satrlar ta’rifi bilan birga, o‘z ijod namunalaridan ham o‘qib, davra ishtirokchilarini xursand etdilar. Shuningdek, talabalar shoir she‘rlaridan namunalar o‘qib berishdi. So‘z navbati shoirning o‘ziga berilgach, u shoirlik kamoloti uchun sababchi bo‘lgan, unga saboq bergan universitet professor-o‘qituvchilariga chuqur minnatdorlik izhor etdi.
Taqdimot so‘nggida muallif “Ko‘rgulik” kitobidan bir nechtasini universitet kutubxonasiga hadya etdi.
