Navoiy davlat universitetiga tashrif chog’ida akademik Bakriddin Zaripov Tabiiy fanlar fakulteti talaba-yoshlari bilan uchrashdi. Dastlab universitet rektori, professor Muxiddin Kalonov olimning erishgan yutuqlari, olib borayotgan faoliyati haqida ma’lumot berib, uchrashuvni boshlab berdi. Uchrashuv davomida akademik B.Zaripov AQSH va Evropa oliy ta’lim tizimi, dars o‘tish texnikasi va texnologiyasi, ilmiy laboratoriyalari haqida ma’ruza qildi. U o’z ma’ruzasida bugungi kunda o’qituvchi-pedagoglarning kasbi murakkablashib borayotganligini bildirib, bunga mos ravishda har bir bo’lajak pedagog chet tillarini bilishi, texnologiya va zamonaviy pedagogik metodlardan to’g’ri foydalana olishi lozimligini uqtirdi. O’zining boy va sermazmun ilmiy faoliyati va pedagoglik tajribasi bilan bo’lishdi. Shuningdek, yurtimizda yoshlarga qaratilgan e’tibor, ta’lim sohasida erishilayotgan yutuqlar haqida so’zlab, Vatanimiz yoshlarini ilm egallash va komil inson etib tarbiyalashda o’qituvchi-pedagoglarning o’rni beqiyos ekanligini ta’kidladi. “AQSH ta’limi va ilm-fani Garvard va Nyu-York universitetlari misolida” mavzusida o‘tkazilgan mazkur mashg‘ulotda professor-o‘qituvchilar, yosh olimlar, talabalar ishtirok etdi.
Maʼlumot uchun, Bakriddin Zaripov Jahon fiziologlar jamiyati akademigi, Rim universiteti faxriy professori, biologiya fanlari doktori. Ayni kunda u Oʻzbekiston Milliy universiteti va Samarqand davlat universitetlarida dars beradi.
